వేసవిలో శరీర ఉష్ణోగ్రతను పెంచే 6 ఆహారాలు – వైద్య నిపుణులు ఏమంటున్నారు?
వరంగల్, నేటి ప్రతినిధి: వేసవి తాపం ప్రజలను అల్లాడిస్తోంది. ఎండ తీవ్రతతో పాటు, మన ఆహారపు అలవాట్లు కూడా శరీర ఉష్ణోగ్రతను ప్రభావితం చేస్తాయి. వేసవిలో శరీరాన్ని చల్లగా ఉంచుకోవడానికి కొన్ని రకాల ఆహార పదార్థాలకు దూరంగా ఉండాలని వైద్య నిపుణులు సూచిస్తున్నారు. సరిగ్గా ఏ ఆహారాలు నివారించాలి? వాటి వల్ల కలిగే ఆరోగ్య ప్రమాదాలు ఏమిటి? అనే విషయాలను హనుమకొండలోని పల్లవి హాస్పిటల్లో జనరల్ ఫిజీషియన్గా సేవలందిస్తున్న డాక్టర్ పవన్ (MD, జనరల్ మెడిసిన్) వివరించారు.
వేసవి డైట్ ప్లాన్: ఏం తినకూడదు?
డాక్టర్ పవన్ ప్రకారం, వేసవిలో మన జీర్ణవ్యవస్థ మందగిస్తుంది. అందుకే, తక్షణ ఉపశమనం కలిగించే తాజా పండ్లు, కూరగాయలు, పుష్కలంగా నీరు తీసుకోవడం మంచిది. కింది ఆహారాలను పూర్తిగా లేదా మితంగా తీసుకోవాలని ఆయన హెచ్చరిస్తున్నారు.
1. ఫాస్ట్ ఫుడ్ & డీప్ ఫ్రైడ్ ఐటమ్స్:
నూనెలో వేయించిన సమోసాలు, బజ్జీలు, ఫ్రైస్, పకోడీలు వేసవిలో చేదుకోవడం మంచిది కాదు. వీటిలో నూనె శాతం అధికంగా ఉంటుంది, వీటిని జీర్ణించుకోవడానికి శరీరం చాలా శక్తిని వినియోగించుకోవాల్సి వస్తుంది. ఇది శరీరంలో వేడిని పెంచుతుంది. అంతేకాకుండా, వేసవిలో ఇలాంటి ఆహారాలు త్వరగా పాడైపోయి ఫుడ్ పాయిజన్కు కారణమవుతాయి.
2. అతి మసాలా & సుగంధ ద్రవ్యాలు:
పులుసు, బిర్యానీ, కారం గరం మసాలా… ఇవి జీర్ణశక్తిని పెంచే ‘ధర్మోజెనీన్’ ప్రక్రియను వేగవంతం చేస్తాయి. దీనివల్ల శరీర ఉష్ణోగ్రత పెరిగి, అతిగా చెమట పట్టడం, గుండెల్లో మంట (ఎసిడిటీ), చర్మంపై దద్దుర్లు రావచ్చు. దాల్చినచెక్క, లవంగాలు, మిరియాలు వంటివి వేసవిలో శరీరాన్ని వేడెక్కిస్తాయి.
3. కూల్ డ్రింక్స్ & సాఫ్ట్ డ్రింక్స్:
వేసవిలో చల్లగా ఉంటాయని రెడీమేడ్ కూల్ డ్రింక్స్, ప్యాకెట్ జ్యూస్లు తాగడం చాలా మంది అలవాటు. ఇది పెద్ద పొరపాటు. వీటిలో చక్కెర శాతం అత్యధికంగా ఉంటుంది. ఇది తాత్కాలికంగా దాహం తీర్చినట్లు అనిపించినా, రక్తంలో చక్కెర స్థాయిని అకస్మాత్తుగా పెంచి, నిర్జలీకరణ ప్రమాదాన్ని మరింత పెంచుతుంది.
4. నాన్ వెజిటేరియన్ ఆహారాలు (మాంసాహారం):
వేసవిలో మటన్, చికెన్, చేపలు వంటి నాన్ వెజ్ తీసుకోవడం వల్ల జీర్ణక్రియ మందగిస్తుంది. మాంసం అరగడానికి ఎక్కువ సమయం పడుతుంది, దీంతో శరీరం ఎక్కువ శక్తిని ఖర్చు చేయాల్సి వస్తుంది. ఇది కడుపు ఉబ్బరం, ఆమ్లత్వం, మలబద్ధకంతో పాటు తీవ్రమైన అలసటను కూడా కలిగిస్తుంది.
5. ఐస్ క్రీమ్ & పాల పదార్థాలు:
వేడి నుంచి ఉపశమనం కోసం ఐస్ క్రీం తినడం వలన శరీరం లోపలి వేడికి, బయటి చలికి తేడా ఏర్పడి జలుబు, గొంతు నొప్పి వస్తుంది. అంతేకాక, ఐస్ క్రీంలలో చక్కెర, కొవ్వు అధికంగా ఉండటంతో బరువు పెరగడం, షుగర్ లెవల్స్ పెరగడం వంటి సమస్యలు తలెత్తుతాయి.
6. పనస & మామిడి పండ్లు:
వేసవిలో లభించే పనస, మామిడి పండ్లు రుచికరమే అయినా, వీటిని అతిగా తినడం వల్ల శరీరంలో వేడి పెరిగి మొటిమలు, జీర్ణ సమస్యలు రావచ్చు. పనసలోని అధిక కార్బోహైడ్రేట్లు బరువు పెరగడానికి, మామిడిలోని గ్లూకోజ్ షుగర్ స్థాయిలను పెంచడానికి దారితీస్తాయి. రెండింటినీ మితంగా (చిన్న ముక్క లేదా ఒక స్లైస్ మాత్రమే) తీసుకోవాలని డాక్టర్ సూచిస్తున్నారు.
వైద్యుల సూచన: వేసవిలో ఇవి తినండి
డాక్టర్ పవన్ మాట్లాడుతూ, “వేసవిలో శరీరాన్ని హైడ్రేట్గా ఉంచుకోవడమే కీలకం. నూనె, మసాలాలు, ఆర్టిఫిషియల్ షుగర్కు దూరంగా ఉండండి. పుచ్చకాయ, దోసకాయ, నిమ్మరసం, మజ్జిగ, నారింజ వంటి సహజమైన చల్లని ఆహారాలు ఎక్కువగా తీసుకోండి” అని సూచించారు.
Disclaimer
ఈ వ్యాసంలోని సమాచారం డాక్టర్ పవన్ (జనరల్ ఫిజీషియన్) వారి వృత్తిపరమైన సూచనల ఆధారంగా రూపొందించబడింది. అయితే, ప్రతి వ్యక్తి ఆరోగ్య పరిస్థితి వేర్వేరుగా ఉంటుంది. మీకు మధుమేహం, బీపీ, లేదా ఏదైనా దీర్ఘకాలిక వ్యాధి ఉంటే, ఆహారంలో పెద్ద మార్పులు చేసుకునే ముందు మీ వైద్య నిపుణులను సంప్రదించడం చాలా అవసరం. ఈ కథనం సాధారణ అవగాహన కోసం మాత్రమే, నేరుగా వైద్య సలహాకు ప్రత్యామ్నాయం కాదు.
